TLB – The Lams Blog

vor zwe wuche hei bruno u ig är andrea ire summer-wunsch i erfüllig bracht … mau ä richtige pool … im internet bstellt … vom camio bis ufe rase glifered u nach 3 tag herter arbeit …

viel studiere no me schweiss u ab und zu chli murgse isch das wärk fertig gsi:

itze no d’umgäbig fertigmache … chli am wätter schrube u mir si parat.

wie immer ds wichtigschte am schluss: ganz äs grosses MERCI a Bruno für d’hilf, die richtige wärchzüg und die viele gute ideeä!

äs het doch i de letschte tage äs paar frage gäh, ob mir de nümme würde schribe uf lams.ch … tja mir hei wender krach no isch ds internet hie ds frankrich kaputt … dr grund isch ganz ä anderä … äs het immer no wind -sunne u wind u sunne

so isch gölä guet ufem wasser versorget u d’andrea mit de kiddis tüesech zwüsche sünnele am pool, ir hängematte chille u spile mit de kollege vertörle … ja mir si richtig i de ferie acho u hei sogar üses blog ä chli vergässe … oder nach luca als steit a chli ufem chopf

u für morn gsets scho wider nacheme perfekte tag us … wär weis villich blibe mir grad bis zum summer hie …

am morge bini mit de kiddis i skatepark. rüeggseggers si o dert gsi. äs isch eifach ober mega hammer cool so nä park. wiso chame das nid o ir schwiz besser gseit z’thun oder stäffisburg mache. äs het so viel kiddis dert gha wo am blade am trottelä am bike oder am rollbrättlä si gsi. aui hei hennä z fride usgseh. bitte bitte bitte, das wäri doch so cool. so fertig gklagt. üser heis uf jedefau extrem gnosse. leider isch du luca mit de blade ufs chnöi gfloge. da hets du für nä momänt nume no grad quitscht u güsset. aber mir hei umi mau schwein gha … isch gloub nid so schlimm wiäs zerst usgseh het. aber weh hets sicher ta u blau isches o d chnöischibe …

am nami isch du gölä vom kite hei cho u när simer no mau ga trampolin gumpe u vorauem go kart fahre …

äs isch du när sofort um näs rennä gange …

zum glück hei beidi mau gwunne …

när sisi no ga quad fahre …madam sira … u dr mösiö luca …

i gloube gölä wäri o am liebste säuber ga fahre … am abe simer när ganz fein ga znacht ässe. mhhhh

am zischti isches nid ä so schön gsi. denn hei mir d kreditcharte usgführt. läck het diä freud gha. zerst i kiabi när i gv-sports när i decathlon när i toys r us u zum abschluss no i mäc ga nä börger ässe.

ganz erschöpft vom lädele heimer du dr nami chi dahei gnosse. gölä isch du no ufs wasser ga kite – het wider super wind gha bis spät am abe. z’ nacht hets du gnocchi gä. isch lecker gsi.

am mänti simer zu üsne fründe uf cassis gange. nach knapp eirä stund simer acho i däm schöne stettli. zum parkplatz sueche heimer o öppe so lang gha … ne nei nid grad. dr parkplatz heimer scho lang gseh, aber d strass dert häre leider nid … schlussändlech simer du dür näs fahrverbot gfahre u gug du, scho simer bim parkplatz gsi. wettti no grad öppis klar stellä, gölä isch de gfahre u nid ig

D jungs hei scho uf üs gwartet. isch ja mega schön dert. aber mit soooo vielnä turis hätti mir nid grächnet.

Sie hei ä mega schöni wohnig gha mit blick ufs meer. hennä schön. zerst hets du afe grad mau äs riesigs aperöli gä u ar frou mutti isches scho heiss worde. zum chüelä simer du chli gä shoppe. äs het mir sehr gfalle. diä lüt, eifach herrlich. d jungs d vätere ud sira si du no chli a strand. zum glace ässe heimer üs du wider troffe.

nachem znacht heimer du heimreis umi i agriff gno. merci no mau luders!

da mir i de letschte tage viel z’viel, aber sehr guets fleisch hei gässe hei mir beschlosse, dass mir hinech wei ä grosse lachs usem meer zieh, wome de hätti chönne ufe grill tue – das uf jede fall isch dr plan vor sira gsi – obs a de falsche würm, de surfer oder sogar am wind isch gläge – uf jede fall gfange heimer aber de gar nüt … nid ämal d’würm si agfrässe worde:

enu de hets halt de umi feieni kotelette vom gril gäh.

am spätere nammitag hets du no gar guete wind gäh, u gölä het mit em 12er kite chönne sich gah ustobe – hüt hets du o weniger chaote als geschter gha, u alls i allem isches a super sunntig gsi.

morn mäntig gömir de zu luders uf cassis gah ä cassis nä – mir freuie üs.

nach em räge chunt d’sunne … ja das isch o hie z’frankrich äs so … aber wes drezu no ä hammer tag mit 7-8 beaufort wescht-wind git de si d’feriä so wisi müesse si

am morge simer mitem luca wider i skate park – potz tusig hüt hets de äs paar jungs gha wos mega im griff hei

drzue hani hüt ds erschte mal würklich meh kiter als windsurfer ir bucht vo almanarre gseh – wunderbar.

gha – mir hoffe ganz fescht das es thun/steffisburg o gli so wit isch u ä söttige park errichtet wird:

d’andrea u kiddis hei der räschte vom tag mit sünnele u neme versuch am pool verbrunge – leider isch d’heizig vom pool “kapput” (bösi zunge säge me chöni so gäld spare) u ds wasser ich nach bim gfüehlte gfrierpunkt.

Hüt het d sira geburi gha … scho achti isch si worde. läck vergeit diä zit!

mir hei natürlich ds mobilhome mit farbige ballön gschmückt u dr tisch isch vou päckli gsi. Da het si du gstrahltet wosi ufgstande isch. zerst het si das mit dä delfine ufta … hm, ä scott velo prospekt? he so cool, merci viel mal …(für was de?) ä katalog mit vilne velo dinne … aha!

würdi dir de eis vo denä gfaue? si het bletteret u bletteret u bletteret u wemär ire nid ä tip hätte gä, wäri si immer no am blettere. si het du ihres troumbike gfunde! das hiä wünschi ig mir!!!! u i säge öich, diä het gstrahlet.

tja liebi sira … das wartet dahei uf di!! juhuiiiiiiiiiiiiiiiiiiiiiiiiiiiiiiiiiiiiiiiiiiii

vo luca het si no lämpli u nä helm becho u no so nä paste wosi de mau cha ballön säuber mache.

am nami isch du d naëlle u yannick cho. mit ihne simer du ga trampolin gumpe u töff/quad fahre. läck het das gfägt!

zum zvieri simer wider ufe camping zrugg. dert heimer du ä feine ärdbeerichuechi gässe.

hüt hets auso extrem kutet. wo luca i kurs isch, hani nume so ghoffet, dass si nä absäge … zum glück isch du gölä mit dere erfreuliche nachricht cho … si heige dr kurs uf morn vertagt. juhuiii! aber si hei mit em surflehrer mit em tamdem surfbrett use dörfe. natürlich nume am strand na. isch ja hennä lustig gsi. luca het ds sägu fascht nid ufebracht. aber ds strahle verratet aues!

denn hets auso äs 8ti kutet. aber mi hets mau probiert

gölä hani gar nid chönne fötele … d föteli si aui verhudlet. mega schad. jä nu, äs anders mau de umi.

am nami si du d kiddis ufem spili gsi mit ihrnä kollege. gölä isch nachem nä erholigs schläfli umi ufs wasser. i hami churz a pool trout, aber nume ganz warm agleit. schad hets ke windstille ort gha. dert wärs nämlich schön warm gsi. am strand hätti hüt dr drei wetter taft haarspray o nüt gnüzt, mi het när usgseh wiä äs grupfts huhn. die frisur hält auso nicht!

gölä het das tip top gmacht mit sim nöi 5er schirm.

jetzt freue mir üs uf morn … d sira wird nämlich scho 8!! hm … scho so nä grossi meite hei mir!!

Gester simer wiä scho verzellt am pool gsi am sünnele. hüt isch ds wätter nid so schön gsi. am morge het luca umi kurs ka. d sira u i si ga dr geburi chueche bstelle. wiä jedes jahr heimer ä mega feini tarte fraise bstellt. ufem märit heimer no ganz feini sache kouft. vom mini würstli bis zu de deluxe ärbeeri über feins gwürz isch aues drbi gsi …

am nami simer när mit gölä a ander strand überi gange. dert si üser kollegä daheim. üser kiddis heis grad mega gnosse mit dr naëlle u am yannick. am strand hani auso mit chappe u doune schilet müesse si. so hanis grad so einigermasse verlitte. isch ja scho komisch, gester im bikini u hüt im doune schilet u chappe …

nach dr kite session vo gölä simer no hurti i decathlon ga schöpperle. u jetzt isch grad äs gwitter düre. so schön!!