U scho heimer …

4 October , 2018 Off By Administrator

Wider viel erläbt. Am zisti simer umi uf fortaleza i wasserpark. Komischer wiis hets nid so viel lüt gha. Auso mir si ja froh gsi. Zerst simer grad so inä wasserkanal. Das isch ender für mi gsi. Hei dert so zwöier bobs gno u heines ids abentür gstürzt. Mir si sicher mit 2km/h vorwärts tukkerlet. Ok, isch jetzt nid so das häiläit gsi aber für mi genau richtig. Natrürli het eini vo dä schnälste u höchste wasserbahni vor wält nid dörfe fähle. I bi o mit, bis zum bekirand. I hami du freiwillig zum fötele zur verfüegig gstellt. Gölä hani verpasst zum filme, dä isch soooo schnäll cho. Het sicher no d badhosi i ….. ta. I bi du ono uf eini. Auso, dert si aus so bis 6 jährigi gsi. O diä isch perfkt für mi gsi :-). Diä drü hei aller bahni abgspuhlet. Am schluss heimer umi ds obligate föteli mit dä gorillas gmacht. Z nacht heimer feins riis mit gmües gha.

Am mittwuch simer grad scho früech, öppe am 8.45 a strand. Ds wasser isch umi zrugg cho. Aber irgend öppis het mega gstunke vom meer här. D sira isch no mau paar stund zum neno i kurs. O d schuhplattler vom oktoberscht mache ä kitekus. Afe mal zwöi bier, u när sisi du ufnahmefähig gsi. Gester hets nid so viel wind gha. Am mittag simer chli hei ids huus ga tschillä. D kiddis heis überhoupt nid begriffä u wäre lieber dert blibä. Aber äbä, mängisch muess mä säch no chli düre setze am nami hei d manne dr kite gflickt u mir si am strand umä tschillet. D sira ds fränzi u i, si no inä täsche lade, dä heisst, project textil. Diä tüe meistens us aute kiteschirme diversi täschene mache. Mi cha o öppis wünsche. Eifach ä guti sach. När simer no zur theresa. Mir si üs scho umi nümme sichr gsi wo das si wohnt. Mir hei du eifach bi paarnä hüüser lut theresa grüeft u ja genau, so heimer sä gfundä. Mir si scho vom neno vorgwarnt worde, dass si de ä scharfe hund heig. Dr hund het si imnä zimmer igsplosse gha. Aber jedesmau wener ad tür gumpet isch, heimer himu angst gha, diä löng de öppe la ga. D sira het eigentli stoff welä usesuechä für näs bikini la z mache. Aber dä hund het d stimmig chli trüebt. Mir si du ohni use z suechä use. Chum heimer ds ise tor zue gha u si im outo ghocket, isch dä hund use cho u isch fasch über ds tor gumpet, mit fletschendä zähn. Mir drü si so öppis vo verchlüpft. Dä hät üs drü no vorem znacht vrtromet. Am abe heimer gmüetlich ir kitschuel brätlet.