wahlsinn …

was mir hüt hei dörfe erläbe, isch absolut dr wahnsinn gsi. nachem zmörgele simer du richtig cowichan bay gfahre. dert heimer bi ocean ecoventures abgmacht gha für nä whael watching tour. Diä adrässe isch üs vo steffisburger empfohle worde. Merci Schindlers!

Mir hei üser mondazüg i empfang gno u hei gnau am guide zueglost. auso ehrlich gseit, hani fasch nid chönne zuelose, i bi so ufgregt gsi. i ha ja nämlich schüsch schiss uf dä boot. jä nu, i hami du so beruhiget, dr wahlfisch hätt o mi mit eim biss verschlückt. aber zum glück het är das nid gmacht, süsch chönnti ja nümme schribe 😉

U los isches, mit em nä gummiboot wo gfahre isch wiä äs speedboot simer übers meer brätteret. mängisch hani auso chli güüset, aber vor freud. um d mondazüg simer du o froh gsi, isch nämli no rächt chüel worde. i gloube däm guide hets o mega gfaue, är het zwüsch düre immer no meh guzzi gä …

Tote still isches i dere bucht gsi. u plötzlich sisi cho. ä vierer familie isch frisch fröhlich näbe üs düre gschwumme. eine het grad sofort ds mändli gmacht. dä het öppe grad hurti welä zeige, wär dr herr im meer isch! diä stilli u das sanfte schwimme vo denä riise tier isch auso besser gsi wo jedes autogene training.

voll berauscht vo denä x idrück öb vo de orcas, weisskopf adler, seelöie, ds schnälle boot oder diä schöne villas uf denä hüfe inseli simer du nach 4 stund zrugg gfahre.

i bi auso imme no extrem häppy!!