so … üsi reis …
Eigentli hani ja aues super planet gha so wäge packe u putze. Gnue zit, isch mis motto das mau gsi. Tja, isch du nid grad unbedingt so cho! Am sunnti ufe mänti het mi körper no hurti gmeint, är müessi risettä. Hm, falscher zitpunkt hani dänkt. aber was i dänkt ha, isch ihm glich gsi. Churzer hand bini du bis am zisti flach im Bett gläge. Am mittwuch bini hurti ä stund ids büro ga fertig mache u ha du när grad zwe stund müesse ga schlafe, dass sech mi körper umi erholt het. Jä nu, irgendwie hanis du mit dr hilf vo marco doch no gschafft, am donnsti am 6 parat ds si.
Praktisch vor üsem huus, heimer üsi reis gstartet. Bus när zug när shuttel u gschlafe heimer im hotel no ds züri. d sira isch fasch düre keit wäge denä hüüfe flüger.
Am friti simer am 7.20 i tscheggä. Wo du d zöllnerin luca gfragt het, ob är aller siner ufgabi gmacht heigi, het är sä du läng agluegt 🙂
Diä nün stund si rächt schäu verbi, u de glich …
Mir hei du grad chli gjuflet, will mir ja nume zwe stund zit hei gha zum umstige. Grad bim ustige heimer z erst mau müesse dr pass zeige u när sicher no drü mau. Dr letscht het du d kiddis gfragt, wär mir sigä, hä? het luca dänkt u s ganz läng agluegt. Aber wo är nä du gfragt het, ob är vorem gsetz uf dr flucht sigi, het luca ganz dütlich u klar JA gseit. Em, da si mir du bau chli i stress cho, aber dr polizist het glachet. ab diä post zum nächste gate. Dert heimer du gmerkt, dass ds flugi fasch andert haub stund verspätig het. Ok, das isch jetzt grad sou doof. mir si nämlich müed u wettä eifach so schnäu wiä müglich witer !!!
Diä letschtä füf stund flug heimer voller adrenalin u stress erläbt. emu i! u i gloube für luca hets o nid so gfägt. im isches nid guet gsi. Zum glück het är du chönne schlafe u mutti o. iregend usem nä grund bini verwachet u luege zu luca übere. da isch är o grad am verwache. är luegt mi geng wisser a bechunnt roti ouge u schweiss uf dr stirn, d backe wärde gross u är dütet mir gäge sis muu. em ok, mis hirni wird churz gforderet, ds bluet schiesst wiä blöd dür mi chopf u i bi völlig glämt. Shit, är muess k…..!!!! was macht mä wemä nid zu dä k…tütene chunnt, da mä ja no äs meitschi ufem schoss am schlafe het, zägg u scho ha ig ihm diä fasch lääri pringels box (weiss ja öppe jedä wiä diä chips box usgseh!) häre gha. Suverän het är sim mage freie louf gä. oje, är het mi auso mega duuret. uf jedäfau hets ihm gwolet, mi maa hani du när o gweckt u är isch du mit em kabinepersonal ga verhandle wiä mä no so chli cha putze. Mir hei luca ufem räscht vom flug sicher 3000 mau gfragt obs geit. hei scho sämtlichi plän wiä mä cha vordänge für ufs wc düre gspielt u si gotte froh gsi, wo mir glandet si, ds vancouver!
dert simer du vo mam u pap härzlich empfange worde! merci!!
Im hotel si kiddis sofort ids bett u mir zwöi heines no äs chlises bier(6,5dl) gönnt u dr zue ä platte voll nachos.