So o scho …
si umi äs paar intressannti täg verbi graset. sis immer no am gniesse!
I bi also voll vom nä bluetegel atakiert worde. Dä siech het mi i oberschänku bisse. Das het auso rächt brönnt. När hani nä fasch nümme drab bracht. Isch sicher auso 1cm läng gsi. Scho nume d vorstellig dass säch sones tier i mini hut het drängt u när no bluet het gsugt, isch auso so öppis vo grusig. E jä nu, houptsach däm fich hets passt.
Marco het am Franciscus no gholfe bim stromere. D ussebelüchtig isch nümme gange. Är isch fine biz froh gsi. u tataaa, si brönnt umi.
Bim kite isch nüt speziells passiert. Luca macht afe rächti sprüng u gölä plaziert dr kite ufem strand. Schöne scheiss, jetzt het är ä schramme im schirm. Chöit öich ja vorstelle, wiä dä dampft het. Dases nid no pfiffe het, isch äs wuder. Dr brünu het du afe gmeint, i söll im äs bier bringe, düngi d närve chli beruhigä 😉 . Zum glück chöise nä hiä grad flicke.
Gester heimer sälber cashew nüss brate. Isch auso ä mega chnübli büetz. Zerst d frucht wäg nä, när das ding brätle, när diä nuss ufschla, hesch aber de nid z fescht dörfe brätsche, schüsch isch d nuss grad muess gsi. Mir hei aui wiä chemifägere usgeseh. Mir hei auso öppe 45minute für näs schäli brucht ds viert u üser huuslüt hei denn ds zwöit sicher scho zwöi schäli voll gha. Tja. Müesse no chli übe!
Hüt simer in Aracati gsi. Isch äs chlises stedtli. Ir chöit öich das nid vorstelle, dä lärm diä lüt eifach dr wahnsinn. Mir si üs das gar nümme gwanet, bi üs hiä isches rächt still (ussert ds radio outo mit dä mega boxe ufem dach 2x2m, wo am ume kurve isch im chline dörfli, lutsterchi uf ghörlos). Fasch i jedem lade steit ä rise lutsprächer wo music louft. Natürlich spile si nid die glichi ab. Mir hei dringend gäud brucht. Da mir wider si vertröschtet worde, heimer dänkt, luege mir de grad im stedtli. Tja, isch nid viel besser gsi. Aber mir heis du gschafft. D lüt si schlange gstande für iri ränte ga ab z holä. D polizei het müesse wach stah, dass si säch nid no vertramplet hei. Isch äs komisches gfühl gsi. U mir si eifach so ä bankomat u hei chole usegla. Si aber vorhär o uf drei banke ga probiere bises du klappet het.
Genau, hüt het üs d Edinete no ä typisch brasilianische Bolo (chuechä) bache. Mit früscher kokosnuss. Isch auso sehr fein gsi. Wär wott o chli probiere?
D sira u i hei hüt ä riise schreck gha ir früsch fleisch abteiig im shopping center (auso shopping center isch grad chli übertribe, isch öppe so gross wiä ds strättlig coop). Bi mir vor cho wiä bi versteckti kamera. D sira het so voll konzentriert id glasvitrine gluegt wo diä grosse bize fleisch ghanget si. U i bi hinder ire gstande u ha o gluegt. När bewegt säch plötzlich öppis u mir beide si so fescht verchlüpft dass mir ä gump gno hei. Dr metzger wo öppis isch am abhänke gsi ir vitrine isch du ab üs verchlüpft. Was sone hand im nä plastichändsche cha verursache … ehrlich gseit, putzt smi jetzt immer no vor lache.
Morn gömer mau wieder uf Tabuba/Cumbuco. Dert häre wo mir diä letschte zwöi mal si gsi. bi gspannt, obs no glich usgseht.