Scho äs paar tag im paradies …
So, sit drü tag simer i däm wuderschöne huus dahei. Äs isch eifach troumhaft.
Üsi huuslüt heit üs mit em nä mega feine znacht empfange. Früsche fruchtsalat u käse/schinke toast. Gli simer du grad ga schlafe, si ja schliesslich scho äs paar stund underwägs gsi. I ha ja mega guet gschlafe! Zum zmorge hets, früschä orangesaft, verschidnegi frücht, säuber gmachts brot, käs, schinke, nutella, orange gonfi, kafi u tee gä. Äs isch hennä fein gsi. Nachem zmorge simer du grad mau a strand ga luegä. Eifach nume wow wow wow!! Gässe heimer kräbse u riis zum zmittag. Das het vorauem ar sira passt. D manne hei iri erste kite seschen gnossä u mir froue ds warme meer. Zum znacht het üs d edenita ä feine früsche fisch kochet/grillet. Am abe wär no äs mega tanz fescht gsi vore im dorf. D edenita het iri töchtere d eduarda (6) du erica (8) hennä gsteilt. Mit lippestift u liidschatte. D sira het mega gstuunet. D haar heisi so ume zwirblet u när hets mega diä schöne locke gä. Diä zwöi girls si hennä uf touet, si schnure mit üs aber leider verstöh mir sä nid 🙂 Si hei üs froue öppe ä stund föteli zeigt u aui persone druffe erklärt … isch ja mega härzig! Mir hei gmerkt, dass dr pastor ä sehr ä wichtigi rolle spielt i irem läbe. Är isch uf jedem dritte föteli druffe gsi.
Gester simer scho früh am strand gsi. Ds zmorge heimer säuber müesse/dörfe mache. Üser huuslüt hei nämli frei gha. Het umi super wind gha u grossi wäuä. Sogar i aus extreme wäuä schisshaas bi dri. Äs isch so schön gsi u vorauem äs het kei strömig gha. Am mittag simer id kiteschuel ga ässe. Hei dert no mit em kiteschuel leiter gred. Isch ä local wo östrichisch red. Tönt zum päägä …
Hüt simer ga ichoufe nachem zmorgä. D edenita het mit üs zämä d ichoufs liste gmacht. Immer dütsch u brasilianisch heimers uf gschribä, dass mirs de im supermark o finde. Aber mir hei du glich paar sache müesse frage. Zum bispiel heimer haar öl gsuecht für ar sira iri rastas. I ha du ä bürste gno bi zure frou wo o vorem haar mittu gstell isch gsi, ha ar sira iri haar chnüpplä zeigt när d bürste u no gzeigt, när “gsch gsch” gseit u mit dr bürste düttet, dass mä umi cha bürste. Tja, het uf jedäfau funktionert. D sira het umi mega schöni glatti haar! Süsch heimer aues becho.
när simer im huus no chli ume tschillet u am zwöi du a strand. Hüt hets nid so viel wind gha. Gölä isch mit em 12er schirm use. Luca het säch mau ä pouse gönnt. Hine gits jetzt filet mignon vom grill, ofe häblä u gloub bohne.
a übrigens, hani mir morn ä massage organisiert. I freue mi scho mega. Hoffe i chönni de no loufe …