Brasilien 2016
So, weni auso vo afang a gwüsst hät, dass o dasmau alles klappet, de hätti de diä vorfreud gnosse!! Erlich gseit, hani mir hennä gedanke gmacht fürs ga. U i bi brutau ufgregt gsi.
so jetzt zu üsere reis. wo luca am donsti am 17.35 isch hei cho, het är no hurti chönä ga täsche wächslä u scho simer gange. mit drü täsche u eim kitebäg simer ufe bös. im bös si no kolleginnä vo luca gsi. diä hei üs ganz komisch agluegt u gfragt, göter id ferie? em ja (wiso hätte mir schüsch so viel täschi drbi??)… diä einti het du gseit, läck, göt ihr äs jahr id ferie, mit so viel gepäck. mi hets fasch putzt vor lache.bim brezel könig heimer no chli proviant kouft, wo grad bis zum bänkli ufem perron glängt het …
ds züri heimer scho grad chönä i tscheggä. so simer üses gepäck afe mau los wordä. d sira het säch mega gedanke gmacht wäg irem flauschi (stoff hund, ca 100cm gross), wo ganz verquetscht ir koffere inne isch gsi. im hotel acho, sisi fasch düre keit, u beidi heisech no ä sprudel wanne gönnt. i bi ids bett gläge u grad sofort gschlafe. am 5.30 isch üsi längi reis los gange.
zerst mit em nä chlinere swiss flugi uf frankfurt. das isch tip top gange. nachemnä churze stopp u flugzüg wächsu simer du mit dr condor witer. bim warte heimer ä lustigä autä brasilianer lere kennä. är u sini frou läbe 6 monet in frankfurt u 6 mönet ds fortaleza. är het üs sehr viel verzellt. im flugi si si grad ir reihe schreg vor üs gsi. bi mir ur sira isch sonä komischä typ häre ghocket. sonä richtigä doofe löu. d madame vor kru het ihm sicher drü mau gseit, är söli sis natel abstellä, aber dä super typ hets eifach nid gmacht. ir start position isch plötzlich dä brasilianer i eire ruh ufgstande u louft füre zu eim vor kru. mis härz isch fasch id hose keit. sofort isch du dr scheff vor kru mit ihm zrugg cho u wider füre gseklet. chum isch dä vore gsi, simer gstartet!! womer si ir luft gis, ischer wiä nä furiä zu däm brasiianer u het ihm mega wüest gseit. het mi auso bau tuuret. dä het ihm ja nume welä ga säge, dass dr ander typ immer no am händi sig!! oje oje…
mir hei ä super ruhigä flug gha. u ds ässe isch o fein gsi. u när schmöckts plötzlich nach rouch, u mir überem atlantik. super hani dänkt. d sira het immer wider gseit, mama schmöcksches o, em nei, was isch de?? klar hanis scho lang gschmöckt gha, aber i has ja nid welä zue gä. ha nämlich bau chli angst gha. chum het mäs no besser gschmöckt, isch scho im lutsprächer ä bösi durchsag cho. är het nid grad gseit, welä dumm siech het ufem wc groukt, aber so hets fasch tönt. u wüsst ihr was, das isch zu 100% dä vor üs gsi!
uf jedäfau simer no guet in fortaleza acho. dert heimer üse fiat doblo in rot entgäge gno u si nach parajuru gfahre. so doof, dr tank isch eigentli läär gsi. aber mi lieb maa het das nidemau so fescht gstört. e da chunnt de scho ä tankstell. genau, u i ha üs scho zmiz uf dere mega outobahn irgend wo gseh stah ohni bänzin!! aber mir hei zum glück grad churz nachem flughafe eini gfundä.
d fahrt i süde isch komisch gsi. näbem nä waldbrand simer düre cho, ä lastwage wo hinde lüt si druffe gstande het üs überhout, outo ohni liecht si üs entgäge cho u ganz hüfe lüt wo z fuess am strasserand si glüffe. wär ja aues fasch normal, ussert dass si äbä fasch kener strasse lampi hei us eifach fischter isch wiä ire chue inne gsi!!! het mi grad vine bitz gstresst. juhuiiii, nach 1.40 simer du bi üsem huus acho.