viel erläbt …

so, hüt heimer nomau ä kite freie tag gmacht, öb zwang oder nid isch glich … aber sicher hets gölä besser ta!!

mir si am morge i mercato central in fortaleza. das isch eigentli äs parckhuus ohni outo dr für mit mega viel ständ … vorauem kleider, schueh, spezialitäten u so knöppleti decheni. isch auso no so idrücklech gsi. d lüt hei ni lang gluegt u hei üs lasi … isch de nid öppe bös gmeint …

mir hei umi vo denä feine sälbst gröstete typisch brasilianische caju-nüss kouft. sooooo fein, ä chi sauz drüber u de sisi perfekt!

d sira het äs härzigs oberteili kouft u ig no so lustegi stroh pfanne undersetzer …

dank äm gps heimers ohni problem gfunde u si nid wiä verwirrti turis ir stadt ume gfreset … das kenne mir ja vo letscht jahr … 🙂

witer simer du no a praia futuro. dert isch ei barraca nach dr andere … eifach voll turi mässig … das heimer ja gwüsst … aber was dert abgange isch, chöit ihr öich nid vorstelle .. tuusegi vo lüt u dr zue no grad so viel verchöifer … u de schüsch no so lüt …

mir hei üs afe mau ads meer füre dränglet … hei ja schwein gha heimer nid no müess astah für dert füre ds cho … vore acho heimer ab denä no grössere wällene gstuhnet. u scho isch dr alfredo oder so cho rüefe het üs äs plätzli irdendwo under em nä schirm bsorgt. är het feini früschi früchte täuer dr bi gha … het üs o sofort eis häre gstellt … so naiv wiä ig bi gsi hani dänkt: läck, das isch de fründlich … aber womer dr erst biiiis gno hei vore melone het är du gseit 10 real bitte … hm … doch nüt gsi vo so fründlich …

dr züäständig chällner het üs du no zämä gschisse will mir bi däm alfonso oder so hei frücht gkouft … besser gseit nämes mir a dass är üs das gseit het … mir verstö ja nid viel portugiesisch …. drü sprite u äs bier heimer bstellt … är hets nid so cool gfunde hei mir nid grad diä ganzi spiesscharte bstellt …

hiä musig dert life dudler hiä no öpper am gitärele so isches när witer gange … luca het sech äs brasil shirt u hose gkouft … u när i säge öich … si si cho wiä hungrigi pirannias wo früsch fleisch gschmöckt hei. gester heimer ja no zu spize zite au 10min müesse nao obrigada säge, hüt heimers grad non stopp gseit … isch grad chli besser acho …

da isch du so nä maler zu mir cho u het uf näs plättli ä schöni zeichnig gmale … da hani fasch müesse ja säge … u när isch du no dä mit de knobel spielzüg cho … dert het du gölä nid chönne nei säge … u schluss ändlech isch no de mit dr perfekte doppel hängematte in wiss schwarz verbi cho … gölä het ds lüchte i mine ouge sofort entdeckt u mau schüch gfragt was diä äch chosti … schliesslich isch si ja handmade … ha gar nid dörfe zuelose … woni du dr priis verstande ha … hani nume so für mi dänkt, das cha ja jetzt nid si … u ha gölä sofort überzügt,sä ds choufe … äs schnäppli … juhuiii

d kiddis u gölä si no chli i diä mega grosse wälle … u i hami chli i sand chillt … u denä zum teil verruckte nicht schwimmer turis zue gluegt …

dr wäg heimer o wider tip top gfunde … e ja, frau navigation isch scho fasch chli profi …