Fortim, Buggy u wildi Hünd

Hüt simer mit drü andernä familiänä uf fortim ga kite. Zwe drvo hei ä buggy gha eini äs taxi u de no mir mit em uralt doblo. Müesse so all paar tag mit dr velopumpi pnö pumpä. D sira u luca hei bim fränzi u dömu im buggy dörfe mitfahre. Am morge hets ds zerst mau chli grägelet. ds kite material heimer uf diä zwöi outos ufteilt. Nach öppe 30min simer im nä andere paradies acho. das willitsch mit erä kite station gits no nid so lang, aues us holz u uf stälzä bouä. Mega schön. Sofort isch d material schlacht los gange. Weli grössi weläs brätt, ä mega diskussion 🙂 . D sira het säch mit dä zwöinä chlinä meitschis beschäftiget u i mi mit läse u sünnelä, het sogar ligistühl gha. Am füfi simer umi richtig parajuru los gfahre. D buggys si am strand na gfahre. Äs uhöllä gejoole, wosi los gmotoret si. Wärend dr fahrt sisi vo zwe agressive wildä hünd verfolgt wordä. Diä zwe hei geng probiert d buggys uszbrämsä. Aber zum glück heis d fahrer im griff gha. Am abe simer no id kiteschuel ga pizza ässe. Ä super abschluss!