Schad u so …
Am fritig si mir am 6.00h am morgä gäge cumbuco zue gstartet. I ha eifach nomau derthäre welä ga luege, wo mir vor 6 u 5 jahr si gsi. äs het üs dert ja mega gfaue gha. I ha ono mau zum huus welä ga luegä. Bi extrem gspannt gsi, ob dä ricardo (vermieter) no dert wohnt oder nid. Scho d fahrt (outobahn) isch intressannt gsi. Plötzich ä fuessgängerstreiffe, ä amplä, ufem «pannestreiffe» ä galopierende esel mit ahänger, si bim nä hotel düre gfahre ohni fänster, ufere strass gsi wos nume lastwäge het gha (ob mir ja dert richtig si gsi, das frag i mi),
chind wo am strasserand wasser verchouft hei. Nach fortaleza simer när richtig caucaia, dert simer zmiz dür d stadt gfahre. Äs het mi richtig beeländet wasmer dert hei gseh. Küder küder u nomau küder. Eifach himmutruurig. Ds Icarai simer när i derä bäckerei wos scho denn het gä ganes sändwich ässe. In Tabuba acho simer diräck zu «üsem» huus gfahre. Mir si grad aui chi schockiert gsi.
üsi villa het schlimm usgseh. Löcher ir wand, d farb wäg (isch so türkis mit gäub agmale gsi), het verlasse usgseh. Aber dr garte het isch schon grün gsi. Auso muess öpper drzue luegä. I bi du zum nachbar ga frage, ob dä immer no da wohni. Ja ja, het är üs aglächlet u mit üs gschnuret aus würde mir üs scho ewig kennä. Das ig nüt ha verstande het är gloub nid gmerkt. Aber das är üs het öppis z trinke abotte hani verstande. Si zrugg zum huus nomau ga chlopfe u hei grüeft (git äbä kes lüti), u när isch är cho uf tue. Im erste momänt het är üs nid kennt, aber wo mir du hei afe redä, da hets bi ihm klick gmacht. D kiddis hei gfundä, dä heig usgseh wiä är ruf droge wär. Dr saber i dä muulegge het är immer no gha (het mi den zumau scho gruuset). Mir si du hurti (öppe ä stund) i garte chli ga höckle. Är het üs viel verzellt vo dene 5 jahr. Är isch bau chli depri gsi. Jetzt wott är ds huus verchoufe. Är weli nöi afa. Het chräbs gha u vor schwarze magie besässe gsi. (hmmmmm…). Jetzt geits ihm aber sit em nä jahr umi guet. I gloube das het luca bau chli angst gmacht. Jä nu, jetzt wüsste mir emu, wo mir de häre müesste … Är het üs o viel vo Brasilie verzellt, vo dä oberste u was alles vertuscht isch worde bir WM u Olympia. Dases vielnä brasilianer meh gschadet het als öppis gnüzt het. Tja, das isch gloub vo ort zu ort verschiede.
Womer si hei cho, isch bi üs dr pool ganz gruusig giftig grün gsi … hei doch no hurti welä ä gump ga dri ä. Nüt isch gsi.
Uf jedäfau bi ig mega froh, hei mir üs für parajuru entschiedä. Mir fühle üs im huus mega wohl! O dr ort u dr strand si mega suber. Eifach herrlich!!
Gester isch d sunne extrem starch gsi obwohls zwüsche düre bewölkt isch gsi. Äs het ab dä drü fasch nümme gluftet. Mi maa het du bau ä sunnestich verwütscht. Am abe hets du langguste u fleisch gä. I ha äbä diä fiecher nid so gärn. Si riise tütscheni gsi. Gölä het vine biz gmurgset für dr panzer uf ztue. Ds fleisch het ihn nid so fein dünkt. Tja, jetzt wüsse mirs. Hei emu aui probiert.
Übrigens isch dr pool wieder wunderbar klar.
Hüt simer scho früh am strand gsi. Poaaaaaa, leider isch ä riise gruppe kiter acho. So dooof! Bis jetzt isches so gmüetlich u zfridä u ruhig gsi. U när das??? Jä nu, o diä dörfe hiä ferie mache. Hätte ja aber eigentli ä wuche später chönne cho. Jetzt hets immer gheisse, dä kitespot kenni niemer. Ha ha ha! Das isch aber ke grund gsi, dr hütig windig tag ds gniesse. Äs het riese wällä gha u nä extremi strömig gäge links. Luca isch o dusse gsi, het mir aber nid so passt. Bi du froh gsi, woner nachere stund umi isch use cho. Gölä isch hennä i dä wälle ume ghönteret. Z mittag heimer no dert gässe si aber när hei. Ä chli d ruh ga gniesse. Heiter scho mau life ä kolibri gseh. Isch ja ganz ä lustige vogu. Hanim hüt chli zue gluegt. Räch närvös das chline vögi.
Znacht simer ines hotel ga ässe. Bim östricher Franz. Isch u fein gsi. är het üs no grad sini alag zeigt. Wow, hennä schön. Dert würd i mi ono wohl fühle. Aber nei, hiä isches eifach perfekt. Merci sabine fürs huus z vermietä!! So jetzt isch scho haubi nüni, ab ids bett. Guet nacht.